Lög Fjárfestingarsjóðs Stórkaupmanna

Samþykkt á aðalfundi 22. október 1970 ásamt breytingum á aðalfundum síðan, síðast á aðalfundi 29. febrúar 1996.

I. kafli

Um nafn, heimili, varnarþing, hlutverk

og sjóðsfélaga.

1. gr.

Nafn sjóðsins er Fjárfestingarsjóður stórkaupmanna. Heimili og varnarþing hans er í Reykjavík. 

2. gr. 

Hlutverk sjóðsins er að tryggja sjóðfélögum aðgang að lánum til hvers konar fjárfestinga á sviði viðskipta eða verslunar, hvort heldur er hér á landi eða erlendis, m.a. með lánum til tækjakaupa, endurskipulagningar og hagræðingar í rekstri, húsnæðisbreytinga svo og fjárfestinga í fyrirtækjum. Þá er stjórninni heimilt að veita lán til meiriháttar fjárfestinga s.s. bygginar verslunarhúsnæðis, sameiginlegra hlutabréfakaupa o.s.frv.

Stjórn sjóðsins skal ávaxta fé hans með sem tryggustum hætti. Er henni í því skyni heimilt að fjárfesta í tryggum verðbréfum, skammtíma skuldaviðurkenn-ingum, hlutabréfum og öðrum viðskiptabréfum hvort heldur er hérlendis eða erlendis. Skal stjórnin annast um að fjármunir sjóðsins njóti sem hagkvæmastrar ávöxtunar á hverjum tíma. 

Félagsmenn í sjóðnum eiga jafnan forgang til lánveitinga úr sjóðnum, en að þeim frátöldum er stjórn sjóðsins heimilt að veita lán til annarra. 

3. gr. 

Sjóðsfélagar geta orðið: Allir félagar í Félagi íslenskra stórkaupmanna, bæði einstaklingar og fyrirtæki að uppfylltum þeim skilyrðum sem lög þessi setja og að fengnu samþykki stjórnar sjóðsins. 

Gangi sjóðsfélagar úr Félagi íslenskra stórkaupmanna missa þeir rétt til aðildar að sjóðnum. Um útborgun eignarhluta í sjóðnum skulu þá gilda ákvæði 9.gr. laga þessara um útborgun vegna úrsagnar. Stjórn sjóðsins getur þó heimilað sjóðsfélögum sem hætta þátttöku í Félagi íslenskra stórkaupmanna áframhaldandi aðild að sjóðnum, óski þeir eftir því og sérstakar ástæður mæla með því. 

II. kafli.

Um aðalfund og félagsfundi.

4. gr. 

Aðalfund skal halda fyrir lok febrúarmánaðar ár hvert. Fundinn skal boða með minnst tveggja vikna fyrirvara, og er hann löglegur hafi verið boðað til hans með bréfi til allra sjóðsfélaga. Einfaldur meirihluti atkvæða ræður úrslitum. Eigi má gera breytingu á lögum sjóðsins nema 2/3 hlutar fundarmanna samþykki breytinguna. Rétt til setu á aðalfundi sjóðsins hafa allir fullgildir félagar hans, eða umboðsmenn þeirra. Enginn má fara með fleiri en eitt atkvæði á fundum sjóðsins Framboðsfrestur til stjórnarkjörs í félaginu og endurskoðenda rennur út tveimur vikum fyrir aðalfund.  Stjórnin skal auglýsa eftir framboðum minnst fjórum vikum fyrir aðalfund.  Í fundarboði skal greina frá framkomnum framboðum.  Tillögur til breytinga á lögum skulu berast stjórn minnst þremur vikum fyrir aðalfund og skulu þær sendar út í fundarboði til kynningar.  

Aðalfundurinn kýs fundarstjóra. Fundarstjóri tilnefnir fundarritara.  

Á aðalfundi skulu tekin fyrir eftirtalin mál:

1. Formaður eða framkvæmdastjóri skýrir frá störfum sjóðsins á liðnu starfsári.
2. Stjórn sjóðsins leggur fram til úrskurðar endurskoðaðan reikning sjóðsins fyrir liðið ár með athugasemdum endurskoðenda og svörum stjórnarinnar.
3. Tillaga stjórnar um ráðstöfun hagnaðar og greiðslu arðs
4. Tillaga stjórnar um lágmarksmánaðargjald til sjóðsins.
5. Tillaga stjórnar um hámarks fjárfestingu í hlutabréfum og erlendum verðbréfum.
6. Kjör formanns, stjórnarmanna og varamanna..
7. Kosning tveggja skoðunarmanna og eins til vara.
8. Lagabreytingar.
9. Önnur mál. 

5. gr. 

Lögmætir félagsfundir hafa æðsta vald í málefnum sjóðsins milli aðalfunda. Boða skal til félagsfunda samkvæmt ákvörðun stjórnar, að kröfu kjörinna endurskoðenda eða samkvæmt kröfu 1/5 hluta sjóðfélga að lágmarki, enda sé fundarefni tilgreint. Fundi skal boða með tilkynningu til hvers sjóðsfélaga með minnst fimm virkra daga fyrirvara, nema brýnar ástæður réttlæti að boðað sé til fundar með styttri fresti. Kröfu um fund skal senda stjórn sjóðsins, og ber henni að boða til fundarins innan þriggja daga frá því að krafan berst henni. Í fundarboði skal geta þeirra  mála er taka skal fyrir á fundinum.  Fundur, sem boðað hefur verið til með löglegum hætti er lögmætur án tillits til þess hve margir sækja hann, nema öðruvísi sé ákveðið í lögum þessum. Fundi sjóðsins skal halda í Reykjavík eða annars staðar, ef sérstaklega stendur á.

III. kafli.

Um stjórn. 

6. gr.

Stjórn sjóðsins skulu skipa fimm menn, formaður og fjórir meðstjórnendur. Einnig skal kjósa tvo varamenn. Formaður skal kosinn sérstaklega og skal hann kjörinn til tveggja ára í senn. Formann má ekki kjósa oftar en tvö kjörtímabil í röð. Árlega skal kjósa tvo af fjórum meðstjórnendum til tveggja ára í senn og tvo varamenn til eins árs. Stjórnin skiptir með sér verkum. Stjórnin kýs varaformann úr sínum hópi. Stjórnin er ákvörðunarhæf ef meirihluti hennar er mættur á fundi. 

7. gr. 

Stjórnin heldur fundi þegar formanni þykir við þurfa, en auk þess er honum skylt að boða til fundar þegar tveir stjórnarmanna krefjast þess. Formaður boðar stjórnarfundi með  þeim fyrirvara er hann telur hæfilegan eftir ástæðum og á þann hátt sem honum þykir tryggilegast hvert sinn. Stjórnarfundi skal halda í Reykjavík, nema allir stjórnarmenn samþykki annað. Gerðir stjórnarfunda skal bóka í gerðabók sjóðsins sem stjórnarmenn undirrita. Stjórnin tekur til meðferðar öll þau mál, sem ekki geta talist dagleg afgreiðslustörf sjóðsins. Þau störf felur stjórnin framkvæmdastjóra. Stjórnin ræður öllum málum sjóðsins milli félagsfunda, og getur innan þeirra takmarka, sem lög þessi setja skuldbundið sjóðinn og eignir hans með ályktunum sínum og samþykktum. Til þess að skuldbinda sjóðinn gagnvart öðrum þarf undirskrift formanns og þriggja meðstjórnenda. 

Stjórnarmenn sjóðsins og varamenn þeirra, svo og starfsmenn sjóðsins, skulu ekki taka þátt í meðferð máls er varðar viðskipti þeirra sjálfra, eða fyrirtækja sem þeir eiga hlut í, sitja í stjórn hjá, eru fyrirsvarsmenn fyrir eða eiga að öðru leyti verulegra hagsmuna að gæta í. Sama gildir um þátttöku í meðferð máls sem varðar aðila sem eru þeim tengdir, persónulega eða fjárhagslega. 

8. gr. 

Stjórnin ræður starfsmenn sjóðsins og ákveður kaup þeirra og kjör. Stjórn sjóðsins, endurskoðendur og starfsfólk skulu gæta fullrar þagnarskyldu um það, sem það kann að verða vísara um starfsemi sjóðsins og hagi viðskiptavina hans.  Óheimilt er stjórnarmönnum að skýra frá því, er fram fer á stjórnarfundum sjóðsins. 

IV. kafli.

Um mánaðargreiðslur sjóðsfélaga, tekjur sjóðsins og lánveitingar. 

9.gr. 

Eigendur sjóðsins eru þeir sem greitt hafa gjald til hans og í þeim hlutföllum sem greitt er.  Eigendur öðlast í sömu hlutföllum eignarhlutdeild í tekjuafgangi sjóðsins og öðrum ágóða hans á grundvelli árlegs uppgjörs þ.m.t. í áföllnum en óbókfærðum verðbótum.  Arðgreiðslur eins og þær eru ákveðnar á aðalfundi geta þeir sjóðsfélagar sem þess óska fengið greiddar út enda hafi þeir greitt reglulega til sjóðsins í minnst 5 ár.  Ósk um greiðslu skal hafa borist stjórn sjóðsins í síðasta lagi 2 vikum eftir lok aðalfundar.  Greiðslur skulu sendar þeim sjóðsfélögum sem þess óska innan sex vikna frá lokum aðalfundar.  Berist ekki ósk um greiðslu, leggst arður við eignarhluta sjóðsfélaga. 

Sjóðsfélögum er óheimilt að framselja eða veðsetja inneignir í sjóðnum, hvort heldur er sem heild eða hluta þeirra nema með samþykki stjórnar. 

Sjóðsfélagar skulu greiða fastar mánaðarlegar greiðslur til sjóðsins.  Aðalfundur ákveður ár hvert lágmark mánaðargreiðslna, en heimilt er stjórninni að samþykkja hærri greiðslur frá þeim sjóðsfélögum sem þess óska.  Heimilt er stjórninni að breyta lágmarksgreiðslum til sjóðsins í samræmi við breytingar á verðlagi, en slíkar breytingar eru háðar samþykki félagsfundar.  Þeir sem verið hafa sjóðsfélagar í 5 ár eða lengur þurfa ekki að greiða fastar mánaðargreiðslur, ef þeir óska.  Gjalddagi mánaðargreiðslu skal vera 5. hvers mánaðar.  Séu greiðslur ekki inntar af hendi á gjalddaga er stjórn sjóðsins heimilt að innheimta dráttarvexti af því sem ógreitt er frá gjalddaga til greiðsludags skv. ákvæðum vaxtalaga nr. 25/1987. 

Fyrstu fimm árin frá inngöngu sjóðsfélaga er inneign hans í sjóðnum eigi laus til útborgunar nema við andlát eða gjaldþrot. 

Segi sjóðsfélagi sig úr sjóðnum, skal eignarhluti hans reiknaður út miðað við næstu áramót á eftir. Skal eignarhlutinn síðan greiddur út strax og ársreikningur sjóðsins fyrir sama ár hefur verið samþykktur, með jöfnum afborgunum á jafnlöngum tíma og algengasti lánstími útlána sjóðsins er þegar úrsögn kemur til framkvæmda.  Skal sjóðurinn greiða sömu verðbætur og vexti á inneignina og sjóðsfélagar greiða af algengustu lánum frá sjóðnum þegar úrsögn kemur til framkvæmda þó að frádregnu því lántökugjaldi sem sjóðurinn áskilur sér á þeim tíma.  Heimilt er þó stjórninni að veita frávik frá þessari reglu um útborgun ef sérstakar ástæður mæla með því.  Draga má frá inneign sjóðsfélaga skuld hans við sjóðinn þ.m.t. skuld vegna gjaldfellingar sem til kemur við úrgöngu úr sjóðnum. 

10. gr.

Heimilt er stjórn sjóðsins að taka lán til endurlána eða verðbréfakaupa að fengnu samþykki löglega boðaðs félagsfundar ef 2/3 hlutar fundarmanna samþykkja lántökuna.  Stjórninni er þá heimilt að tryggja slík lán með eignum sjóðsins og eignarhlutum einstakra sjóðsfélaga í sjóðnum.  

Stjórn sjóðsins er óheimil lántaka með útgáfu og sölu á skuldabréfum og öðrum endurgreiðanlegum skuldaviðurkenningum í eigin nafni til almennings. 

11. gr. 

Stjórn sjóðsins ákveður lánakjör af lánum, svo og lántökugjöld.

 12. gr. 

Lán má veita úr sjóðnum gegn þeim tryggingum sem stjórnin metur öruggar.  Þá er inneign sjóðsfélaga á hverjum tíma til tryggingar þeim lánum sem sjóðsfélagi hefur fengið úr sjóðnum. 

13. gr. 

Áður en stjórnin tekur ákvörðun um lánveitingu úr sjóðnum, skal hún gefa umsækjanda kost á að senda skriflega lánsumsókn með upplýsingum um þær framkvæmdir, sem láns er óskað til.   

Stjórn sjóðsins sér um frágang lánsskjala og tekur ákvarðanir um útborgun lána.  Lántaki greiðir öll opinber gjöld í sambandi við lántökuna svo sem stimplun, þinglýsingu og kostnaði vegna mats á veðsettri eign. 

14. gr. 

Ef lántaki greiðir eigi lán á réttum gjalddaga, óskar greiðslustöðvunar, bú hans er tekið til meðferðar sem þrotabú, ef hinni veðsettu eign er eigi haldið nógu vel við, ef lántaki lætur fyrirfarast að greiða vátryggingariðgjald af veðinu eða neitar að láta stjórn sjóðsins í té skilríki fyrir að svo sé gjört, ef gjört er fjárnám í hinni veðbundnu eign eða beðið um uppboð á henni, lántakandi segir sig úr sjóðnum eða veðsett fasteign er seld, þá er lánið allt í gjalddaga fallið og heimilt að heimta það allt greitt án sérstakrar uppsagnar.  Stjórn sjóðsins getur, hvenær sem er á lánstímabilinu, heimtað nýjar veðtryggingar fyrir eftirstöðvum láns verði talið að veð hafi gengið úr sér eða sé ekki lengur, vegna verðlagsbreytinga, næg trygging fyrir láninu. 

15. gr.  

Heimilt er að starfrækja sjóðinn í deildum, eftir þeim ávöxtunarleiðum sem í boði eru hverju sinni. Geta sjóðfélagar valið hvort mánaðarframlag þeirra renni til allra deilda, eða hvort það renni óskipt til einnar deildar. Nánari reglur um starfrækslu deildar skulu settar á aðalfundi, þar sem m.a. skal tekið fram um  fjármögnun deilda, með hvaða hætti fjármagn viðkomandi deildar skuli ávaxtað o. fl.

V. kafli.

Um reikningshald, endurskoðun o.fl. 

16. gr. 

Reikningsár sjóðsins skal vera almanaksárið.  Reikningar skulu ávallt vera fullgerðir a.m.k. viku fyrir aðalfund með áritun og athugasemdum endurskoðenda.  Heimilt er stjórn sjóðsins að láta löggildan endurskoðanda annast endurskoðun reikninganna.  Endurskoðendur sjóðsins skulu ávallt eiga greiðan aðgang að öllum bókum, verðbréfum og skjölum sjóðsins, og er þeim  skylt að hafa nákvæmt eftirlit með allri bókfærslu sjóðsins og ganga úr skugga um að allt sé í fyllstu reglusemi þar að lútandi.